HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
AMINADO si Pola Mayor Ina Alegre na nahirapan siya sa muling pag-arte sa harap ng kamera. Nangyari ito sa idinireheng pelikula ni Neal Buboy Tan ang 40 Days handog ng ComGuild Productions na pinagbibidahan din nina James Blanco, Michelle Vito, at Cataleya Surio.
“Sobrang hirap dahil sa tagal na hindi ako gumawa ng pelikula medyo nahirapan ako sa pag-arte pero andyan naman si James na umalalay sa akin at nag-coach,” ani Ina.
Sinabi pa ni Mayor Ina na isa sa challenge sa muli niyang paggawa ng pelikula ay kung ano ang magiging outcome nito. “Siyempre naiisip natin kung ano ba magiging outcome ng movie at magugustuhan ba ni direk? Siyempre si direk ang iniisip ko ‘yung ano bang qualities ang magugustuhan niya? Tama ba ang acting ko? Andito pa ba ako sa showbiz? Paano ko dadalhin ang mga manonood doon sa karakter na mayroon ako.
“Sobrang hirap, sa sobrang tagal na hindi gumawa ng pelikula medyo nahirapan ako sa pag-arte,” paliwanag pa ng mayora na muling tumatakbong mayor sa ikalawang pagkakataon ng Pola, Mindoro.
Sinabi pa ni Ina na na-challenge siya sa mga kasamahan niyang aktor dahil lahat ay magagaling.
Naikuwento pa ni Mayor Ina na naiyak siya nang muli niyang mapanood ang kanilang pelikula. Ipinakikita kasi sa pelikula ang challenge na kinaharap nito niya nang magkaroon ng pandemic na kinailangan niyang makauwi sa pamilya bagamat nagkaroon ng lockdown.
Ipinakikita rin sa pelikula ang kahalagahan ng pamilya na anumang hirap, sakripisyo o sakit haharapin lahat basta para sa pamilya gayundin ang matibay na paniniwala sa Panginoong Diyos.
Ukol naman sa kung ipalalabas ba ang 40 Days sa Netflix sinabi nitong on process at depende sa magiging usapan. “Napakaganda ng movie kaya iniisip pa natin kung saan talaga ipalalabas. At habang pinapanood ko naaantig pa rin ang puso ko kahit ako pa rin ang andoon.
“Hindi pa sure kung maipalalabas commercially since may pandemic pa. May usapan kami na gusto naming ipalabas abroad pero uunahin muna natin ang mga special screenings sa Pilipinas at saka natin ibenta sa Netflix then ibenta abroad,” paliwanag ni Mayora.
Naikuwento naman ni direk Neal na mapapagod ang manonood sa kanyang pelikula dahil pinaglakad niya si Mayora Ina ng 40 days.
Aminado naman ang Mayora na talagang napagod siya. “‘Yung pagod totoo kahit hindi naman talaga 40 days ako naglakad pero napagod ako dahil magkasabay na trabaho sa pagiging punong bayan iyong paggawa ng pelikula.
“Kasabay din ang negosyo, sabay-sabay siya. Pagod ako sa acting pinapahirapan kasi ako ni direk Neal Tan ha ha ha. Tingin ko kasi na perfect na para sa akin pero pinauulit pa niya, silang dalawa ni James (Blanco, na kasama rin sa pelikula at umalalay sa akting ng mayor) para sa kung ano pa ang pwede kong gawin sa eksena.”
Sinabi pa ni Ina sa isinagawang press conference pagkatapos ng advance screening na isinagawa sa isang gymnasium sa Pola, Mindoro na, “nasisiyahan ako sa outcome ng movie sa paulit-ulit nilang sinasabi na sige pa, kulang pa, gawin mo pa ito. Natutuwa na nai-guide nila ako nang husto. Kaya James maraming salamat.”
Sa huli, gustong maka-inspire ng pelikulang 40 Days na anumang problema ang dumating sa ating buhay laging may solusyon at laging kakapit sa Itaas dahil Siya lamang ang makatutulong sa atin. Likas ding matulungin ang tao na bagamat may problema o hirap na kinakaharap, may tutulony at tutulong pa rin.
Sa kabilang banda, masaya si Mayor Ina gayundin ang mga Polaeno dahil noon lamang nagkaroon ng screening sa kanilang lugar. Kaya naman talagang ipinakita ng mga Polaeno ang kanilang suporta sa Ina ng kanilang Bayan dahil napuno ang pinagdausan ng advance screening. Bukod sa mga cast at iba pang bumubuo ng 40 Days,sinuportahan din ang screening ng vice mayor ng Pola, Board Members gayundin ng ibang mayor ng bayan ng Mindo at ang tumatakbong Vice Governor ng Mindoro na si Ejay Falcon. Sumuporta rin ang manager ni Liza Soberano na si Ogie Diaz na matagal nang kaibigan ng Pola Mayor.
