HATAW! D'yaryo ng Bayan hatawtabloid.com
HATAW News Team
KAMAKAILAN may mga ikinalat si Anak Kalusugan Party-list representative Mike Defensor na paratang at alegasyon laban sa lokal na pamahalaan ng Quezon City.
Ngunit mukhang nag-backfire ito kay Defensor dahil sa kontrapunto ni Quezon City Spokesperson Pia Morato, na nagmistulang katatawanan ang mismong nag-akusa.
Ayon kay Defensor, kinukuwestiyon ng Commission on Audit (COA) ang kairalan ng pandemic procurements ng lungsod, na nagkakahalaga ng P479 milyon. Lumabag din umano ang city government sa mga regulasyon ng procurement law.
Dagdag ni Defensor, ang mga pahayag na ito ay galing umano sa pinakabagong COA report, na kaka-post lang daw sa website ng COA.
Ngunit kung titingnan ang website ng COA, wala naman bagong post o report dito. Sa katunayan, ang mga alegasyon ni Defensor ay batay sa report na naka-post sa website ng COA noong Hulyo 2021 pa.
Ito ay “partial section”, o maliit na bahagi lamang, ng year-end audit report ng Quezon City para sa taon 2020.
“Palagay ko ay panahon na para kumuha ng mas mahusay na researcher at PR team ang panig nina Defensor,” ayon kay Morato.
Ipinaliwanang ng spokesperson, noong ipinadala nila ang kanilang statement sa media, nag-research ang mga reporter at editor para alamin kung totoo nga ba ang mga paratang ng kampo ni Defensor.
Doon nila nakita na galing ito sa year-end COA report na iginawad sa Quezon City ang pinakamataas na audit rating sa buong kasaysayan ng lugar. Ang intensiyon nila ay sirain ang reputasyon ng QC LGU, pero kabaliktaran pa ang nangyari.”
Sa 42 pahina ang buong COA report, ang mga bintang ni Defensor ay kinuha lamang sa tatlong pahina nito. Ang umano’y pagkuwestiyon ng kairalan ng P479 milyon para sa pandemic procurements ay wala rin sa nasabing report, ngunit may payo ang COA na dapat makompleto ng QC, ang mga requirement upang mapag-aralan ito ng ahensiya.
Ipinahayag ni Morato, “sa loob ng ilang linggo lamang, ipinasa ng QC LGU ang lahat ng supporting documents kaugnay nitong P479 million. Dahil sobrang nasiyahan ang COA sa aming paperwork at transparency, binigyan nila kami ng highest unqualified opinion para sa buong taon.”
“Mukhang masyado nang matagal sa loob ng bahay si Rep. Defensor, kaya ‘ata siya nalilito. 2022 na, ‘wag na tayo mag-imbento at gumawa ng mga kuwentong minero, lalo na tungkol sa mga bagay na nangyari noong 2020 pa,” pagtatapos ni Morato.
