HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
HINDI lang puro maiinit na eksena, kundi puno rin ng nagbabagang emosyon at drama. Ito ang nais ipabatid ni Direk Brillante Mendoza sa kanyang pagbabalik-pagdidirehe sa pamamagitan ng pelikulang Sisid na handog ng Viva Films at nagtatampok kina Paolo gumabao, Vince Rillon, Christine Bermas, at Kylie Verzosa.
Ani Direk Brillante, nag-enjoy siya sa paggawa ng Sisid dahil sobra siyang na-challenge.
“Challenge kasing gawin itong Sisid, parang paano magiging interesting ang isang BL movie?,” ani Direk Brillante na first time pa lang gumawa ng BL movie.
Sinabi pa ng premyadong direktor na pinaghirapan nila ang pelikula na hindi basta-basta hubaran lang. “May kuwento ito at marami ring mapupulot na aral. Marami tayong malalamang bago ukol sa relationship.
“It’s a story of love. Ito ‘yung love na totoong pagmamahal. Totoong pagmamahal ng babae sa lalaki at totoong pagmamahal ng lalaki sa kapwa lalaki that are being expressed in different ways,” anang direktor.
Iginiit pa ni Direk Brillante na bagamat ukol sa BL ang pelikula, “Hindi ko talaga tinanggap ‘yung issues about the environment.”
Ang pelikula ay ukil kina Jason (Paolo), isang Marine Biologist na asawa na si Abby (Kylie) na magpupunta sa Pola, Mindoro. Roon ay naatasan sila ni Jason na pamunuan ang rehabilitation at preservation ng isang fish sanctuary. Makikilala ni Jason ang kanyang diving assistant na si Dennis (Vince), at mabilis silang magkakasundo. Habang magkasama sa trabaho, mas makikilala nila ang isa’t isa. Makikilala ni Jason ang pamilya ni Dennis sa kanyang mga kuwento, at bilib si Dennis sa pagmamahal ni Jason sa kanyang trabaho. Malalaman din nila ang kani-kanilang malalaking problemang hinaharap. Nabuntis ni Dennis ang kanyang girlfriend na si Tanya (Christine), habang si Jason at Abby naman ay ilang taon nang sumusubok na magbuntis, ngunit bigo sila dahil sa sakit ni Abby.
Sa pagdaan ng mga araw, mahuhulog ang loob nina Jason at Dennis sa isa’t isa at ‘di magtatagal ay bibigay din sila sa tawag ng kanilang katawan. Ngunit magiging magulo ang lahat sa pagkakatuklas ni Abby sa kanilang lihim na relasyon, at mahuhuli sila sa akto ng pagtatalik.
Panoorin ang mga komplikadong emosyon ng mga relasyon sa Sisid. Tunghayan ang kanilang Digital World Premiere sa January 18. Sa halagang P499, mauuna mong mamalas ang natatanging kuwento ng Sisid at makipagpakamustahan sa mga cast at sa director nito sa isang espesyal at exclusive one night event. Kinabusakan, January 19, mapapanood na sa Vivamax Plus, ang bagong pay-per-view service ng Viva. Sa halagang P249, mapapanood mo na ang bagong obra maestra ng internationally-acclaimed director na si Mendoza.
Magsisimula naman ang regular streaming ng Sisid sa March 18 sa VIVAMAX Philippines, Hong Kong, Taiwan, Thailand, Malaysia, Indonesia, Singapore, Japan, South Korea, Macao, Vietnam, Brunei, Maldives, Australia, New Zealand, the Middle East, Europe, Canada, at America.
(MVN)
