Paskong masaya sa CSJDM, Bulacan

SA PAGNANAIS mabigyang kasiyahan ang mga residente ng San Jose Del Monte City, Bulacan, inilunsad ng pamahalaang lokal ang “Christmas Parade” nitong Martes, kalahok ang mga Disney characters.

Ito ang ikalawang taon ng Christmas Parade na pinangunahan ni SJDM Rep. Florida “Rida” P. Robes na inilunsad sa Savano Park sa nasabing lungsod, tampok ang ilang timbulan o floats sa parada, sakay ang mga lumahok na tauhang hango sa Disney characters.

May kasamang mga mananayaw o street dancers ang mga timbulan habang pumaparada patungo sa mga pangunahing lansangan na labis na ikinagalak ng mga residente at mga manonood.

Sinabi ni Robes, ang parada ay iikot sa lahat ng mga pangunahing lansangan sa lungsod ng San Jose Del Monte sa loob ng isang buwan upang maghatid ng kasiyahan at tuwa sa mga mamamayan, lalo sa mga bata ngayong panahon ng Kapaskuhan.

        “Christmas is for the children and it is the aim of this parade to bring cheer to the people especially the young and young at heart as we celebrate the Christmas season. We want to have a fun-filled and merry Christmas for every San Joseño,” pahayag ni Robes.