Si Claudine at ‘di si Greta ang tatakbo sa Halalan 2022

COOL JOE!
ni Joe Barrameda

MARAMI ang humanga kay Gretchen Barretto sa magandang ginawa niyang pamimigay ng ayuda sa iba’t ibang personalidad sa loob at labas ng showbiz. Kahit na mga hindi niya kilala personally ay nakatanggap ng ayuda na ikinagulat ng iba.

Marami tuloy ang nag-isip na papasukin niya ang politika pero nagka mali sila dahil hanggang sa huling araw ng filing ng COC o Certificate of Candidacy ay walang Gretchen na nakita sa mga opisina ng Comelec.

Ang kapatid na si Claudine Barretto ang nakita sa Olongapo Comelec Office na nag-file ng kanyang COC para tumakbong Konsehal sa nasabing siyudad sa ilalim ng partido ng kanyang talent manager na si Arnold Vegafria na tatakbong Mayor.

Kahit bukal sa loob ni Gretchen ang pagkakawanggawa, may bumabatikos pa rin sa kanya na kesyo hindi naman sa kanyang bulsa nanggaling ang ipinambili sa mga ayuda kundi kay Atong Ang na ka-tandem niya sa mga sabungan. Mariin itong idinenay ni La Greta.

Gayun man, regardless kung totoo man o hindi, doon tayo sa magandang ginawa ni Gretchen na kusang nag-share ng blessings. ‘Yun ang ikinahanga ng marami na namigay siya na hindi naman niya kailangan gawin ng walang kapalit. ‘Yung mga bumabatikos ay inggit ang nananalaytay sa katawan.

Sana sa mga ganitong pagkakataon ay iwasan natin ang inggit at maging positive lahat.