HATAW! D'yaryo ng Bayan hatawtabloid.com
BUMAHA ang mga personal protective equipment (PPEs) sa Bureau of Customs (BoC) bago ideklara ni Pangulong Rodrigo Duterte ang unang lockdown sa buong Luzon noong Marso 2020.
Isiniwalat ito ni Sen. Panfilo Lacson sa ika-10 pagdinig ng Senate Blue Ribbon Committee sa maanomalyang multi-bilyong medical supplies contract na nasungkit ng Pharmally Pharmaceutical Corporation mula sa Procurement Service-Department of Budget and Management (PS-DBM).
“Bakit kine-claim na scarcity of supply kung napakaraming dumating mula March 17- 30, 2020?” sabi ni Lacson patungkol sa pahayag ni dating PS-DBM chief Lloyd Christopher Lao na wala silang mahanap na medical supplies kaya bumili sa Pharmally sa halagang P27 kada isa.
Ipinakita ni Lacson sa Senate hearing ang nakuha niyang listahan ng mga kompanyang nagparating ng face mask sa Filipinas mula 17- 30 Marso 2020 na umabot sa 46,790,000
Paliwanag niya, sa 45 kompanya na supplier sa PS-DBM, nakorner ng Pharmally ang 26.39% ng kabuuang supply gayong may makapag-i-import ng medical supplies, face mask, face shield, PPEs na hindi kasama sa listahan gaya ng One Link Trading, AGNA General Merchandise, at Flexidrive Hardware Trading.
Ang customs broker aniya nito ay si Jeffery Manalo ng Fababeir brokerage at sa record ng One Link ay nakapagpasok na ito ng 46,790,000 mula 17-30 Marso 2020 pa lamang.
“So available ang supply as of 17 March 2020 kaya hindi tama ang sinasabing scarcity of supplies ng face mask kaya mabilis nakapag-deliver ang Pharmally, March 25. Nag-usap sila ng March 24 , sina Linconn Ong at Atty. Lao and then March 25, andiyan na ang delivery,” ani Lacson.
Si Linconn Ong ang isa sa matataas na opisyal na umamin sa Senado na si Michael Yang , dating economic adviser ni Pangulong Rodrigo Duterte, ang nagpautang sa kanila ng kapital para matugunan ang kontratang nakuha sa PS-DBM.
Nakapagdala agad ang Pharmally ng 500,000 piraso ng face mask sa PS-DBM kahit walang purchase order at imbes P8-M lamang ang babayaran ay naging P13.82 milyon.
Giit ni Lacson, 46 milyon ang supply ng face mask na dumating sa bansa ng panahong iyon kaya imposible ang katuwiran ni Lao na kapos ang supply.
Ibinulgar ng senador na isang James Tan, umano’y operations manager ni Michael Yang, ang importer ng PPEs na ginamit ang serbisyo ng Fababeir brokerage.
“And I understand, a certain James Tan , who is allegedly the operations man of Michael Yang, ito ‘yung nagpaparating, ito ‘yung importer. Making use of the services of Fababeir because ang nakapirma nga sa documents ay si Jeffrey Manalo,” ani Lacson.
Sa pagharap sa ikalawang pagdinig sa Senado, itinanggi ni Yang na pinautang niya ng puhunan ang Pharmally bagkus ay ipinakilala lamang ang mga opisyal ng kompanya sa mga supplier sa China.
Hiniling ni Lacson sa BoC na isumite sa komite ang listhan ng dumating na medical supplies sa bansa mula Marso 2020 hanggang sa kasalukuyan upang makita ang volume at kung sino-sino ang importer.
“So, ito ‘yung ikot ng supply ng face mask, face shields, and starting June 2020 dito na nagsariling import ‘yung Pharmally and I was informed na dito na nagkaroon ng problema ‘yung transaction between Pharmally and Mr. Michael Yang kasi naging malaki ‘yung mark-up sa pagsu-supply ng medical supplies especially face mask and face shield through the courtesy of Michael Yang to Pharmally,” sabi ni Lacson.
Sa kanyang regular na Talk to the People, todo depensa si Pangulong Duterte kina Lao at Yang at wala umanong anomalya sa kontrata ng Pharmally sa gobyerno.
Nag-ugat ang isyu sa 2020 Commission on Audit (COA) report na pinuna ang dispalinghadong paggasta ng Department of Health sa pandemic funds at kuwestiyonableng paglipat ng P42-B sa PS-DBM.
(ROSE NOVENARIO)
