HATAW! D'yaryo ng Bayan hatawtabloid.com
ni ROSE NOVENARIO
ILUSYON na lang ni Pangulong Rodrigo Duterte na gusto pa ng mayorya ng mga Pinoy na manatili siya sa puwesto matapos ang kanyang termino sa Palasyo sa 2022.
Batay sa resulta ng Social Weather Stations (SWS) survey, tatlo sa limang Pinoy ay naniniwala na ang 2022 vice presidential bid ni Duterte ay labag sa intensiyon ng 1987 Constitution.
Sa 1,200 adults na tinanong sa survey mula Hunyo 23 -26, lumabas na 60 porsiyento ay nagsabi na ang balak na pagtakbo ni Duterte bilang VP ay unconstitutional — ‘it violates the intention of the Constitution, which should first be amended before he may run for office again’,” ayon sa SWS.
May 39 porsiyento lamang ang nagsabi na dapat ituloy ni Duterte ang pagkandidato bilang VP “because I would like his management of the government to continue.”
Habang ang natitirang isang porsiyento ay hindi nagbigay ng sagot.
Pinakamataas ang pagtutol sa VP bid ni Duterte sa
Luzon 65%, sa Visayas 59%, sa Metro Manila ay 56% at sa Mindanao 53%.
Matatandaan, inamin ni Pangulong Duterte na takot siya sa mga nakaambang kasong isasampa laban sa kanya pagbaba sa puwesto sa 2022 kaya nagpasyang sumabak sa 2022 vice presidential race.
Naniniwala ang ilang kritiko na pinaiikutan lang ni Duterte ang probisyon sa Konstitusyon na nagbabawal sa dagdag na termino sa Pangulo kaya’t pinupuntirya ang Vice President post na nasa mandatory line of succession kapag nabakante ang posiyong presidente.
