Bea at Dominic lihim ang date

KITANG-KITA KO
ni Danny Vibas

TIYAK na ang saya-saya ni Dominic Roque ngayong panahon ng pandemya at bakuna. Kahit kailangan ng social distancing, “lihim” pa rin silang nakakapag-date ni Bea Alonzo.

“Lihim” ang pagdi-date nila dahil hiwalay ang pagpo-post nila sa respective Instagram nila pagkatapos ng date. At kahit na wala ni isa man sa posts na magkasama sila, madali ring nabubuko ng sharp-eyed netizens na magkasama sila sa lugar na pinagkunan ng mga litrato ng bawat isa sa kanila—dahil parehong-pareho naman ang mga detalye sa mga larawan.

Sa isang Japanese restaurant ang latest date nila kamakailan, batay sa sabay na pagpo-post nila ng pictures.

Sa Tiktok account n’ya nag-post si Dominic ng compilation ng videos ng pagpunta niya sa isang Japanese restaurant.

Makikita sa videos ang Japanese dishes—appetizer, main course, dessert—at champagne na in-order ni Dominic.

Pero kapansin-pansing dalawang wine glass ang nasa video, indikasyong may kasama si Dominic.

Sa dulo ng video ay may dalawang kamay na mahigpit na magkahawak.

Kapansin-pansin ang squarish gold watch, na mabilis namataan ng netizens at agad ikinompara sa lumang Instagram pics ni Bea suot-suot din ang nasabing relo.

Ikinakilig naman ito ng fans ng dalawa. Ipinost nila ang screenshots ng mga post nina Bea para ihambing ang pagkakapareho ng relo.

Sa Instagram Story naman ni Bea ay ipinost niya ang mga larawan ng kanyang well-deserved treat.

Kumain siya sa Japanese restaurant at nagkataong ang mga inorder niyang sashimi, Japanese desert, at brand ng champagne ay kagayang-kagaya ng mga ipinost ni Dominic.

Ang hinihintay na lang ng marami ay ang direktang pag-amin nina Bea at Dominic sa kanilang relasyon, bagamat hindi rin naman nila itinatangging may ugnayan na sila.

May napapala naman siguro sila sa kunwa-kunwariang lihim na pagdi-date nila.