Inflation, food insecurity, labanan, magtanim sa bahay — solon

NANAWAGAN si Deputy Speaker at Las Piñas City Rep. Camille Villar sa mga Pinoy na paigtingin ang urban farming sa bansa bilang tugon sa tumataas na inflation at kawalan ng pagkain.

Ani Villar, ang pagtatanim sa sariling bakuran ay isang paraan para labanan ang kahirapan dulot ng pandemia dahil sa CoVid-19.

“Food security is very important. We can grow our own food in our own backyards [through] urban gardening. We can help feed our families at healthy pa ‘yan para sa ating mga anak,” ani Villar.

Sa kanyang mensahe sa isang online forum sa selebrasyon ng International Women’s Day noong 8 Marso, hinimok ni Villar ang taongbayan na mag-urban farming.

“The pandemic has really disrupted the lives of people especially the vulnerable. Maraming hamon ang dumating. Mayroong nawalan ng trabaho, lumiit ang kita, at talagang maraming dinaanang pagsubok,” aniya.

“Puwede rin itong pagkakitaan at hindi kailangan malaki ang kapital para magsimula. Puwede itong gawin sa labas ng bahay and it doesn’t require a very big space, nakatutulong ka pa sa environment at nakagaganda ng kapaligiran,” pahayag ni Villar.

Sa Kamara, isa si Villar sa mga awtor ng House Bill No. 8385 o ang Integrated Urban Agriculture Act na naglalayong gamitin ang mga bakanteng lupa, mga gusali at iba pang bakanteng lugar para sa agrikultura.

Aniya, puwedeng gamitin ito sa pagtatanim, sa poultry, pag-alaga ng baboy at sa maliit na palaisdaan.

Ang panukala ay naipasa ng Kamara sa pangatlo at huling pagdinig.

Hindi na bago ang konsepto ng urban farming pero nagkain­teres ang mga tao rito dahil sa pandemya.

(GERRY BALDO)