HATAW! D'yaryo ng Bayan hatawtabloid.com
NALAMBAT ng mga awtoridad ang apat na drug peddlers at pushers samantala nasakote ang dalawang drug users sa mga ikinasang illegal drug operations ng pulisya sa lalawigan ng Bulacan hanggang kahapon, 16 Marso.
Sa magkahiwalay na buy bust operations na ikinasa ng Station Drug Enforcement Units ng San Jose del Monte City Police Station (CPS) at Hagonoy Municipal Police Station (MPS), arestado ang mga suspek na kinilalang sina Mac Jomel Mariano, at Elmer Clemente, alyas Emeng matapos bentahan ng ilegal na droga ang police poseur buyer.
Kasunod nito, nadakma ang mga suspek na sina Ginalyn Puniado, at Mikee Parreño, nang mahulihan ng mga sachet ng shabu.
Samantala, hindi nakapalag sina Ardwin Suarez at Sherwin Lucas nang arestohin ng mga police operatives matapos mahuli sa aktong bumabatak ng shabu sa isang pot session.
Nasamsam mula sa mga suspek ang 33 sachets ng shabu, 2 sachets ng marijuana leaves, at 5 pots ng marijuana.
Dinala ang mga nakompiskang ebidensiya sa Bulacan Crime Laboratory upang suriin samantala inihahanda na ang kasong kriminal laban sa mga suspek.
(MICKA BAUTISTA)
