HATAW! D'yaryo ng Bayan hatawtabloid.com
DAHIL sa announcement na noong February 10 (sa US) ipalalabas ang grand finals ng America’s Got Talent: The Champions (AGT), akala ng madla, pati na ang mga Kano, malalaman na kung sino ang kampeon.
Siyempre pa ang interes nating mga Pinoy ay kung nagwagi ba ang ating pambato, ang dating tagapag-alaga ng mga manok noong kabataan niya, si Marcelito “Mars” Pomoy.
Totoo namang ipinalabas noong February 10 sa Amerika sa NBC network ang grand finals—pero hanggang sa performances lang pala ng mga finalist ang ipinalabas.
Sa February 17 pa sa US itatanghal ang pag-a-announce ng mga nagwagi. Dagdag na kita pa nga naman para sa AGT producers at sa network ang dagdag na telecast.
Naka-post na sa You Tube ang final performance ni Mars at ang reaksiyon sa kanya ng apat na hurado. ‘Pag pinanood n’yo ‘yon, madidiskubre n’yong nag-standing ovation ang tatlo sa apat na hurado sa pag-awit ni Mars ng Beauty and the Beast sa dalawa n’yang tinig na lalaki at babae.
Ang nag-iisang judge na ‘di tumayo ay si Simon Cowell na siya pa namang lead judge (punong hurado) at sinabihan pa si Mars na dapat ay mas mahirap at mas challenging na kanta ang inawit n’ya.
Hindi sumagot si Mars, pero pagkatapos maipalabas ‘yon ay ininterbyu siya ng ABS-CBN News tungkol sa reaksyon n’ya sa mga sinabi ni Simon. (January 2020 ay nasa Pilipinas na si Mars. Noong Disyembre 2019 ini-record ang buong Champions season na ‘yon ng AGT.)
Sa panayam na ‘yon ibinuko ni Mars na si Cowell mismo ang nagsabi sa kanya na Beauty and the Beast ang kantahin n’ya.
Dahil alam naman ni Mars na napaka-influential ni Simon bilang producer, founder, at lead judge ng show, ‘di siya makatanggi.
Gaya nang naiulat na namin noong nakaraang isyu ng kolum na ito, Disyembre 2019 pa lang ay alam na ni Mars ang naging kapalaran n’ya sa paligsahang iyon, pero di n’ya pwedeng ipagtapat hanggang ‘di pa naipapalabas—February 17—sa Amerika ang episode na ininunsiyo ang final winners.
Ano man ang naging kapalaran sa higanteng paligsahan ng kababayan nating dating poultry boy, siguradong ipinagmamalaki natin ang husay n’yang umawit, ang lakas ng loob, at katatagan n’ya.
KITANG-KITA KO
ni Danny Vibas
