4-anyos bata, patay sa gulpi nanay, amain arestado

DINAKIP ng pulisya ang isang ina at kaniyang live-in partner matapos mapatay sa gulpi ng ginang ang sariling anak sa bayan ng Norza­garay, sa lalawigan ng Bulacan kamakalawa ng gabi, 27 Enero.

Sa ulat na ipinadala ng Norzagaray Municipal Police Station (MPS) kay Bulacan police director P/Col. Emma Libunao, kinilala ang mga suspek na sina Claudine Valdez at Raymar Nugui, kapuwa residente sa Sitio Curvada, Bgy. Minuyan, sa naturang bayan.

Una rito, nabatid sa ulat na dakong 8:00 pm ay isinugod sa pagamutan ng amaing si Raymar ang bik­timang 4-anyos na bata (hindi na pinangalanan).

Idineklarang dead on arrival ang bata ng attending physician sanhi ng malulub­hang pasa at galos sa kata­wan ng biktima.

Lumabas sa imbesti­gasyon ng mga tauhan ng Norzagaray MPS na nag­karoon ng pagkakamali ang bata kaya ginulpi siya ng inang si Claudine sa harap ng live-in partner na si Raymar.

Nang lamog na ang kata­wan ng bata at hindi na kumikilos ay saka ito isinu­god ng stepfather sa paga­mutan ngunit idinekla­rang patay na.

Kapwa inaresto ng pulisya ang live-in partners na kasalukuyang nakakulong sa Norzagaray Municipal Jail at takdang sampahan ng kasong kriminal.

(MICKA BAUTISTA)