Dani, ‘di pa rin napapatawad si Kier; Apo, ‘di pa ipinakikita

MUKHANG sinasadya ni Dani Barretto, panganay na anak ni Marjorie Barretto, na pasakitan ang ama niyang si Kier Legaspi.

Kamakailan, ipinakita n’ya ang may ilang buwan pa lang anak na si Millie sa ina ni Kier (Hershey Legaspi, byuda ng aktor na si Lito Legaspi noong September 8, 2019) at sa pamilya ng kuya ni Kier na si Zoren at sa pamilya nito.

Parang wala talagang balak si Dani na ipakita ang baby n’ya kay Kier. Kahit sabihin pang hindi n’ya alam kung saan nakatira si Kier at ang pamilya nito, dahil anim na taon na silang walang komunikasyon, tiyak alam ni Zoren kung paano makokontak ang nakababatang kapatid.

Alam n’yo na sigurong hindi inimbita ni Dani ang ama niya noong ikinasal kay Xavi Panlilio last year. Katwiran ni Dani, ‘di naman malaki ang nagawa ni Kier sa pagpapalaki sa kanya. At ang ina lang n’yang si Marjorie ang maitutururing n’yang magulang, si Marjorie ang pinili n’yang maghatid sa kanya sa altar.

Kadalasan, nagiging mapagpatawad ang mga babae ‘pag naging ina na sila, lalo na sa mismong araw na nagsilang sila. Sinasabing ang bawat babaeng nagsisilang ay nasa hukay ang isang paa, kaya’t itinuturing nilang pangalawang buhay na ang matagumpay nilang pagsisilang.

Parang ‘di nga totoo ‘yon sa kaso ni Dani.

Okey na rin sana ang pagdadala n’ya sa anak n’ya sa lola nitong si Hershey at kay Zoren, pati na sa pamilya nito.

Pero hindi na n’ya dapat ibinuyanyang ‘yon sa Instagram n’ya at natunghayan ng maraming tao. Magiging pasakit ‘yon sa ama n’ya. Mistulang pang-iinsulto ‘yon.

May negative karma ang ‘di pagpapatawad, ang pagmamalaki, pagkimkim ng sama ng loob.

‘Di kaya takot si Dani sa karma?

KITANG-KITA KO
ni Danny Vibas