HATAW! D'yaryo ng Bayan hatawtabloid.com
WALA nang makapipigil sa pagpapatupad ng ikalawang yugto ng The Tax Reform for Acceleration and Inclusion (TRAIN) Act sa susunod na taon.
Nagbigay ng go signal si Pangulong Rodrigo Duterte sa implementasyon ng ikalawang yugto ng TRAIN Law makaraan ilatag sa kaniya ng economic managers ang mga dahilan.
Sinabi ni Budget Secretary Benjamin Diokno, nakita ng Pangulo ang malaking halagang ibinagsak sa presyohan ng langis sa pandaigdigang pamilihan na inaasahang lalo pang sasadsad pagsapit ng Enero 2019.
Ayon kay Diokno, mula sa pinakamataas na presyong $80 per barrel ng crude oil ay bumagsak ito sa $68 per barrel nitong 29 Nobyembre at nakikitang lalaylay pa hanggang $60 dollars per barrel sa 2019.
Gayondin sa presyo ng diesel na mula sa pinakamataas na P49.80 kada litro ay bababa sa P37.76 kada litro sa Enero 2019, kasama ang dalawang pisong excise tax.
Ang gasolina ay nakikitang babagsak sa P50.82 kada litro sa Enero 2019, kasama rito ang dalawang pisong excise tax mula sa pinakamataas na presyong P60.90 kada litro.
Ayon kay Diokno, ipinatutupad lamang ni Pangulong Duterte ang TRAIN law.
ni ROSE NOVENARIO
INFLATION RATE MAIBABALIK SA 2% — DBM
KOMPIYANSA ang Department of Budget and Management (DBM) na babalik sa dating 2% hanggang 4 % range ang inflation rate pagsapit ng 2019 at 2020.
Sinabi ni Budget secretary Benjamin Diokno, ito ay dahil humupa na ang presyo ng mga bagay na nagpapataas ng inflation, o pressure sa mabilis na pagtaas ng presyo ng mga bilihin.
Ayon kay Diokno, ito ay dahil patuloy ang ginagawang hakbang ng pamahalaan para mabuhusan ng suplay ng pagkain ang merkado.
Ito kasi aniya ang mabilis magpagalaw sa presyo ng mga bilihin, pangunahin na rito ang lagay ng suplay ng bigas, karne, at gulay sa palengke.
Sa ngayon, sinabi ni Diokno na matatag ang suplay ng bigas sa merkado, at sapat din ang suplay ng karne ng manok at baboy sa mga pamilihan.
Tiniyak din ng Bureau of Aquatic Resources na sapat ang suplay ng isda sa mga palengke.
Inianunsiyo ng Philippine Statistics Authority (PSA) na bumaba sa 6 porsiyento ang inflation rate sa nakalipas na Nobyembre, mula sa dating 6.7 porsiyento noong Oktubre ng kasalukuyang taon.
(ROSE NOVENARIO)
Oposisyon nagbabala
HUWAG MATUWA SA BUMAGSAK NA INFLATION
NAGBABALA ang oposisyon kahapon na huwag masyadong matuwa sa ipinamalita ng gobyerno na bumaba na ang inflationn bagkus mag-abang aniya sa muling pagtaas nito sa Enero pagkatapos ng implementasyon ng pangalawang yugto ng excise tax sa produktong petrolyo.
“Ang pag-aproba sa implementasyon ng second tranche ng excise tax hike sa ilalim ng TRAIN Law ay isang malungkot na balita para sa lahat,” ani Magdalo Rep. Gary Alejano.
Ayon kay Alejano, bukod sa pagpapaasa sa taongbayan dahil sa urong-sulong na desisyon ng gobyerno sa pagsuspende ng excise tax, itinaon rin ito sa panahon ng Kapaskuhan.
“Hindi pa nga tayo nakababangon sa sunod-sunod na pagtaas ng bilihin, dinagdagan na naman ang ating mga pasakit. Para bang binigyang muli ng krus na papasanin ang mga Filipino,” dagdag ni Alejano.
Aniya ang pagtaas ng excise tax sa susunod na taon ay may malaking epekto sa taongbayan.
“Mabigat ito kahit may rollback ang presyo ng petrolyo sa pandaigdigang merkado. Naniniwala ako na tataas pa itong muli kapag nilimitahan ng Russia at Organization of Petroleum Exporting Countries (OPEC) ang produksiyon ng petrolyo. Once the price of fuel in the world market surges, the Filipinos will be burdened again,” paliwanag ng mambabatas ng Magdalo.
May magandang paraan para makalikom ng pondo ang bayan.
“Imbes ipilit ang pagtaas ng excise tax, mas mainam na pag-igihin natin ang tax collection sa Bureau of Internal Revenue at Bureau of Customs. The government has unused appropriations every year. Hindi excise tax hike ang solusyon at dapat makinig ang gobyerno sa hinaing ng mga mamamayan.
Sa panig ni Akbayan Rep. Tom Villarin ang pagbaba ng inflation rate ng 6% mula sa 6.7 % ay hindi makabubuti dahil mataas pa rin ang presyo ng mga bilihin.
Pareho ang pananaw ni Alejano at Villarin na tataas din ang mga presyo kapag ipinatupad na ang pangalawang excise tax sa Enero.
Klaro, ani Villarin, na ang pagtaas ng presyo o inflation ay sanhi ng pagpataw ng excise tax sa produktong petrolyo at hindi sa presyo ng petrolyo na nasa US$49 kada bariles. (GERRY BALDO)
