HATAW! D'yaryo ng Bayan hatawtabloid.com
KINONDENA ni Vice President Leni Robredo ang pilit na pagtutulak ng mga kaalyado ng administrasyon sa charter change, sa gitna ng sanga-sangang problema dala ng TRAIN Law at inflation.
Ayon sa Bise Presidente, mas makatutulong sa mga mamamayan kung ibinubuhos ng mga mambabatas ang kanilang oras sa mga panukalang makatutulong upang maibsan ang pabigat na dala ng nagtataasang presyo ng mga bilihin.
Ito ay matapos aprobahan ng House of Representatives sa 2nd reading ang isang resolusyon para sa proposed federal constitution, sa parehong araw na pinayagan ni Pangulong Rodrigo Duterte ang pagtuloy sa planong pagpapataw ng fuel excise tax sa susunod na taon.
“Malinaw na usap-politika ang mas mahalaga para sa liderato ng Kamara, na ipinakita nito sa pagpasa ng House Resolution na nagtutulak sa Cha-Cha,” ani Robredo.
“Sa aming pag-iikot sa mga pinakamalalayong lugar sa ating bansa, iisa ang hinaing ng ating mga kababayan — ang pagtataas ng presyo ng mga bilihin.”
Dagdag niya: “Ngunit kitang-kita na hindi ito ang nais tutukan ng administrasyon: delayed na nga ang ayuda para sa mahihirap, binawi pa ang suspensiyon ng fuel excise tax sa January 2019 — at ngayon ipinagpipilitan ang kagustuhang baguhin ang sistema ng pamahalaan.”
Ayon kay Rep. Vicente Veloso, pinuno ng House committee on constitutional amendments, ang pagtutulak nila sa nasabing panukala ay bahagi ng pagtupad sa agenda ng administras-yon.
Nauna nang sinabi ng Malacañang na kabilang sa mga prayoridad ni Pangulong Rodrigo Duterte ang pagsusulong ng federalismo.
Para kay Robredo, dapat unahin ng administrasyon “ang mga alalahaning pinakamalapit sa bituka at pamumuhay” ng mga Filipino, lalo na iyong mga naghihirap, kaysa pamomolitika.
Matagal nang itinutulak ng Bise Presidente na pagtuunan ng pansin ang pagbibigay-solusyon sa matataas na presyo ng mga bilihin na naranasan nitong taon, sa gitna ng pagtaas ng inflation rate ng bansa at ang problema sa suplay ng bigas.
HATAW News Team
