Thursday , February 29 2024
Malacañan CPP NPA NDF

Malalim na pang-unawa sa ugat ng armed conflict hirit ng CPP sa pres’l bets

NANAWAGAN ang Communist Party of the Philippines (CPP) sa 2022 presidential bets na magkaroon ng malalim na pang-unawa sa mga ugat ng armadong tunggalian sa bansa.

Inihayag ito ng CPP sa isang kalatas kasunod ng pahayag ni Vice President Leni Robredo na kapag naluklok sa Malacañang ay isusulong niya ang “localized peace talks” para tugunan ang ugat ng problema na tinukoy niya bilang kahirapan at hindi pagkakapantay-pantay.

Habang si Aksyon Demokratiko standard bearer Manila Mayor Francisco “Isko Moreno” Domagoso ay inilarawan ang New People’s Army (NPA) bilang mga taong ‘naligaw ng landas’ na dapat kombinsihin na “magbalik-loob” dahil “mayroon lamang isang gubyerno.”

“Anopaman, sa puntong ito, dapat nating paalalahanan kapwa sina Robredo at Moreno na ang pagkakamit ng maka­ta­rungan at pangmatagalang kapayapaan ay nanga­ngailangan ng malalim na pag-unawa sa mga ugat ng armadong tunggalian, gayondin sa kasaysayan at proseso ng negosasyong pangkapayapaan,” anang CPP.

Dapat lagpasan umano nila ang mababaw at makitid na pananaw na ang nagaganap na “digmaang sibil” sa buong bansa ay resulta lamang ng mga “lokal” na usapin at hindi iniluwal ng sistema­tikong problema na malawak na nakaaapekto sa masang magsasaka, manggagawa, at pang­gitang uri — lalo ang kawalan ng reporma sa lupa at pambansang industriyalisasyon, na tinanggihang ipatupad ng mga nagdaang gobyerno bilang isang programa para kamtin ang katarungang panlipunan at ekonomyang nakatatayo sa sariling paa at maunlad.

Hindi anila dapat kalimutan ni Robredo na mismong si Pangulong Rodrigo Duterte ay nagtaguyod sa  localized peace talks at maging si Davao City Mayor Sara Duterte ay matagal na itong isinusulong sa kanilang siyudad ngunit napatunayang isa itong kabiguan.

Para sa CPP, imbes magtaguyod ng kapaya­paan ang localized peace talks ay naging katumbas ito sa “kampanyang pagpapasuko” ng Armed Forces of the Philippines (AFP) na ang lokal na mga residente ay arbitraryong inaakusahang mga kasapi ng NPA at pinipilit na “sumumpa ng katapatan” sa AFP.

Bilang dating human rights lawyer, dapat umanong silipin ni Robredo ang laganap na pag-abuso ng militar at pulis sa ilalim ng “lokal na usapang pangkapayapaan.”

“Nagsilbi rin ang “lokal na usapang pangkapa­yapaan” bilang tabing para itago ang malawakang korupsiyong kinasa­sangkutan ng ilandaang milyong pisong pondo para sa mga programang “pangkabuhayan” at “balik-baril,” na ipina­titipon ang taongbaryo para tanggapin ang mga ‘subsidyo’ at pinapipirma sa mga blankong papel, na kalauna’y ginagamit bilang ebidensiya ng kanilang ‘pagsuko.’

Nais umanong makita ng bayan kung may pagkakaiba kay Duterte ang isusulong na peace talks ng mga umaasinta sa Palasyo sa 2022 at kung bukas sila sa pagpa­pawalang-bisa sa Proclamation 370 at 374, pagbubuwag sa National Task Force-ELCAC at pagbasura sa Anti-Terrorism Law (ATL) na mga hadlang sa pagba­balik ng usapang pang­kapayapaan.

“Makikita pa lang kung ang mga kandidato sa pagkapangulo ay matatag na titindig laban sa patakarang “kill, kill, kill” ng rehimeng Duterte at gagawa ng tindig na sasalamin sa hangarin ng mga tagapagtaguyod ng kapayapaan at ng mama­mayan na nais sumulong ang usapang pang­ka­payapaan lampas sa mga seremonya tuwing may bagong rehimen,” anang CPP.

(ROSE NOVENARIO)

About Rose Novenario

Check Also

Law court case dismissed

Sa Jemboy Baltazar case
PULIS GUILTY SA HOMICIDE, 4 KABARO, 4 BUWAN KULONG BUGAYONG, ABSUWELTO 

“GANOON LANG? Makalalaya lang sila, sana maramdaman din nila ‘yung nararamdaman ng pamilya ko ngayon …

Sa kasong Statutory Rape LAGUNA REGIONAL LEVEL NA MWP INARESTO NG MAGDALENA POLICE

Sa kasong Statutory Rape
LAGUNA REGIONAL LEVEL NA MWP INARESTO NG MAGDALENA POLICE

CAMP B/GEN. PACIANO RIZAL – Arestado ang isang most wanted person (MWP) sa regional level …

DSWD Project LAWA BINHI DRT Bulacan

DSWD Inilunsad ang Project LAWA at BINHI sa DRT, Bulacan

SA layuning matugunan ang mga epekto ng El Niño phenomenon sa mga mahihirap at mahihinang …

PNP PRO3

PRO3 pinuri ng COA sa pananalapi, at sa 2024 exit conference

NAKATANGGAP ng mataas na papuri ang Police Regional Office 3 (PRO3) sa 2024 Commission on …

Rapist ng Quezon Province nagtago, nalambat sa Bulacan

Rapist ng Quezon Province nagtago, nalambat sa Bulacan

ISANG pugante na may kasong panggagahasa sa Quezon Province ang nahulog sa kamay ng batas …