HATAW! D'yaryo ng Bayan hatawtabloid.com
DESIDIDO nang mag-focus ang newbie hunk actor na si Marlon Marcial sa kanyang showbiz career. Sixteen years old pa lang kasi nang una siyang sumabak sa showbiz bilang model, ngunit hindi pa siya seryoso noon kaya para siyang palitaw na lulubog-lilitaw pa ang drama.
Si Marlon ay tampok sa advocacy film na I Love You L. C. Kasama niya sa pelikula sina Tommy Peñaflor at Jef Gaitan. Mapapanood ito sa third week ng January 2019.
Paliwanag ni Marlon, “Bale, first lead movie ko po ‘to. Bago ito, marami na rin po akong nagawang project, kaso lang ‘di nga po ‘yung lead, parang support-support lang po ako.
“Kasi, 16 years old po ako noong nagsimula sa modelling. Model po talaga ako. Tapos po tumigil ako sa modelling ng three years, nag-aral po ako sa FEU. Business Adminstration po, major in Marketing. Tapos po niyon, after one year po, nag-enroll ako sa Star Magic workshop.”
Si Marlon ay six footer, 22 years old na tubong Zambales, nag-aaral sa FEU, at isang dating magsasaka. Nakalabas na siya sa Kambal-Karibal sa GMA-7.
Game ba siyang gumawa ng indie film na may mga sexy scene, may kissing scene sa kapwa lalaki? “Sa akin po, hindi naman po ako maarte sa ganoon, basta may project po ako. And, trabaho lang naman po sa akin iyan,” aniya.
Aminado si Marlon na idol niya si Coco Martin at kung bibigyan ng chance, gusto niyang sundan ang yapak ng star ng FPJ’s Ang Probinsyano ng ABS CBN.
“Idol ko po si Coco. Kasi nagsimula siya sa pa-sexy, sa mga ganoong pelikula, nag-indie rin si Coco… na kahit walang kapit sa showbiz ay talagang nagsikap siya, tapos ngayon isa na siyang superstar na sikat na sikat na po.
“Kahit one fourth lang o katiting lang nang narating ni Coco Martin ang maabot ko rin po, magiging masayang-masaya na po ako niyan,” nakangiting saad ni Marlon.
ALAM MO NA!
ni Nonie Nicasio
