HATAW! D'yaryo ng Bayan hatawtabloid.com
MAINIT na pinag-uusapan ang aksiyong-seryeng FPJ’s Ang Probinsyano dahil hindi nagustuhan ng Philippine National Police Director General Oscar Albayalde ang umereng kuwento na masama ang mga miyembro ng pulis.
Bagama’t may disclaimer naman na kathang isip lang at hindi ipinakikita ang mga totoong tao sa organisasyon ay tila hindi pa rin sapat ito dahil may plano ang DILG na magpapataw ng kaukulang aksiyon, kasama sa kaso ang pagbabawal sa pag-ere ng show, ang paggamit ng police uniform, kagamitan at maging ang paggamit ng acronym ng Philippine National Police (PNP) na nasa ilalim ng DILG base sa pahayag ng spokesperson na si Jonathan Malaya.
Natanong naman ang aktor na si Eddie Garcia na kasama sa Ang Probinsyano pagkatapos ng presscon ng pelikulang Hintayan ng Langit nila ni Gina Pareño kung ano ang reaksiyon niya.
“As for the issue, well it’s up to them, its management’s call. I have nothing to do with it, I’m just an actor there,” katwiran ng beteranong aktor.
Gumaganap si Eddie sa karakter na Don Emilio Syquia rati at ngayon ay siya na si Señor Gustavo Torralba.
Si Gina naman ay nagpahayag kay Coco bilang si Cardo Dalisay na makakayanan nito ang isyung kinakaharap ng programa niya.
“Apo, stay positive. I know you can overcome. After all, we’re just doing our job as actors,” saad ng aktres.
FACT SHEET
ni Reggee Bonoan
