HATAW! D'yaryo ng Bayan hatawtabloid.com
NIREGALUHAN ni Sharon Cuneta ang matagal na rin pala n’yang kaibigang si Kris Aquino ng Oscar de la Renta wool sweater na umano’y nagkakahalaga ng P89,000!
Ipinost ni Kris sa Instagram n’ya (@krisaquino) ang litrato ng sweater at nilagyan ng mahabang caption na nagkukuwento tungkol sa pagiging magkaibigan nila ng megastar at kung kailan siya nagsimulang maging fan nito.
Noong 10 years old pa lang si Kris, (1980) at sa Boston, USA sila naninirahan, dalawa lang ang VHS films sa bahay nila na Tagalog: ang Dear Heart at My Only Love na parehong pinagbidahan ni Sharon.
Ang deskripsyon nga pala ni Kris sa regalo ni Sharon ay “simply BEYOND.”
May ilang taon na rin palang nagbibigay ng regalo sa isa’t isa ang dalawang mega idols bilang magkaibigan pero may kasunduan sila noong mga nakaraang taon na hindi nila ipababatid sa madla ang ginagawa nilang ’yon.
Pero overwhelmed nga si Kris sa ganda at halaga ng regalong “simply beyond” kaya’t ibinahagi n’ya sa madla ang kagalakan.
Bukod sa tatak, ang isa pang ikinatuwa ni Kris sa sweater ay ang pagkakaroon nito ng dekorasyong puso na binuo sa pamamagitan ng pulang sequins.
“The heart I believe is symbolic because we’ve both welcomed each into each other’s hearts,” paglalahad ng babaeng tinaguriang Queen of Online World and Social Media.
“I feel so blessed to be considered her friend,” pagbabando ni Kris na Ate Sharon ang tawag sa megastar.
Forty-seven years old na si Kris at 52 naman si Sharon. Hindi nga pala si Kris mismo ang nagbando ng presyo ng sweater. May mga netizen na hinanap ang estilo ng sweater sa website ng Oscar de la Renta signature products at nadiskubre nilang halos P89,000 ang presyo ng ganoong estilong sweater na produkto ng world-famous designer.
Ang post ni Kris sa Instagram (@krisaquino) ay nakatanggap na ng mahigit sa 33,000 LIKES noong Lunes (March 5). Isa sa mga nag-like ay mismong si Sharon.
KITANG-KITA KO
ni Danny Vibas
