HATAW! D'yaryo ng Bayan hatawtabloid.com
PATAY ang isang babaeng pasahero habang sugatan ang kanyang kasama at ang driver ng sinasakyan nilang Grab Taxi nang maipit sa karambola ng tatlong naglalakihang truck sa southbound lane ng Nagtahan Bridge sa Sta. Mesa, Maynila kahapon ng madaling-araw.
Kinilala ang namatay na biktimang si Ivory Abaya, 25, habang sugatan ang isa pang pasaherong si Karen Graneta, 25, at ang driver ng Grab taxi na si Antonio Maraaya.
Batay sa ulat ng Manila Police District (MPD) – Station 6, pauwi sa kanilang condominium mula sa pinagtatrabahuang casino sina Abaya at Graneta, sakay ng taxi ni Maraya, dakong 3:40 am nang maipit sila sa karambola ng tatlong bumibiyaheng truck sa lugar.
Ayon sa driver ng trailer truck na may kargang buhangin na si Edison Gonzales, nawalan siya ng preno habang pababa ng Nagtahan Bridge, kaya’t sumalpok siya sa isa pang truck sa kanyang unahan, na mabilis namang dumausdos at sumalpok sa likurang bahagi ng kotse o Grab taxi na sinasakyan ng tatlong biktima.
Todong lakas na bumangga ang Grab taxi sa unahan na isa pang truck na nagresulta sa pagkamatay ng isa sa mga biktima at pagkasugat ng dalawa pa.
Sa naturang karambola ng apat na sasakyan, nayupi na parang lata ang Grab taxi.
( LEONARD BASILIO )
