5 bumulagta sa anti-drug ops sa Maynila

LIMANG hinihinalang drug pushers ang sunod-sunod na bumulagta sa isinagawang magkakahiwalay na buy-bust operations ng mga pulis sa Maynila.

Batay sa ulat ng Manila Police District-Crimes Against Persons Investigation Section (MPD-CAPIS), unang tumimbuwang si Abner Nasi, alyas Abeng, 41, barangay tanod at residente sa Juan De Moriones St., Binondo, at isang alyas Muslim.

Habang arestado ang live-in partner ni Nasi na si Janneth Rivas , 27, sa operasyon ng mga pulis ng MPD-Station 11, dakong 2:00 pm nitong Biyernes sa kanilang bahay.

Pagsapit ng 12:45 am kahapon, napatay ng mga pulis ng MPD-Station 10, si John Perola, alyas Koyang, nasa hustong gulang at residente sa Gomez St., Paco, Maynila, sa loob ng kanyang barong-barong.

Napatay ng mga pulis ng MPD-Station 5 si Alex Jamilon, 30, ng Brgy. 650, Zone 60, Tamborong, Port Area, Manila dakong 12:50 am sa loob ng kanyang barong-barong.

Samantala, isang alyas Oteng ang napatay ng mga pulis ng MPD-Station 2, dakong 1:17 am sa Road 10 kanto ng Zaragosa Street sa Tondo.

( LEONARD BASILIO )