Barangay chairman itinumba sa Batangas

BATANGAS – Patay ang isang 62-anyos barangay chairman makaraan pagbabarilin ng hindi nakilalang mga lalaki sa bayan ng Laurel nitong Sabado ng hapon.

Kinilala ng pulisya ang biktimang si Nejemias Ariola, chairman ng Brgy. Leviste sa Laurel, Batangas.

Ayon sa ulat ng pulisya, pauwi ang biktima sa kanilang bahay lulan ng kanyang motorsiklo dakong 2:35 p.m.

Biglang sumulpot ang dalawang motorsiklo na lulan ang mga suspek, at bigla siyang pinagbabaril.

Ang biktima ay tinamaan ng bala sa ulo at sa iba’t ibang bahagi ng kanyang katawan na naging dahilan ng kanyang kamatayan.

Ayon sa mga saksi, makaraan ang insidente, ang mga suspek ay mabilis na tumakas patungo sa Talisay.

Hindi pa mabatid ng pulisya kung ano ang motibo sa pagpatay sa biktima at sa pagkakilanlan ng mga suspek.