Reporter niratrat habang natutulog, patay

PATAY ang reporter ng Daily Tribune makaraan pagbabarilin sa loob ng isang bodega sa lungsod ng Pasig.

Kinilala ni Senior Supt. Jose Hidalgo, chief of police, ang biktimang si Gemma Angeles, asawa ng isa ring reporter na nakaligtas sa pitong tama ng bala na si Fernand Angeles nang pagbabarilin noong 2012, nakatira sa Cattleya Compound, Brgy. Pinagbuhatan sa lungsod.

Sa inisyal na imbestigasyon ni SPO1 Ricardo Alapitan, natutulog ang biktima sa loob ng bodega nang pasukin ng hindi nakilalang suspek at pinagbabaril hanggang mamatay.

Narekober sa lugar ang dalawang basyo ng bala mula sa kalibre .45 pistola at drug paraphernalia.

Naniniwala ang mga awtoridad, may kaugnayan sa ipinagbabawal na droga ang motibo sa pagpatay.

Bago nangyari ang krimen, ilang ulit na nakita ang biktima sa Pasig PNP Headquarters.

Maaaring naghinala ang mga suspek na ang biktima ang nagsusuplong kaugnay sa kanilang illegal na gawain.

Nagsasagawa na nang malalimang imbestigasyon ang mga awtoridad para maaresto ang mga suspek at upang mabatid ang tunay na motibo ng pagpatay.