Ginang nagbigti sa naudlot na outing

NAGBIGTI ang isang 34-anyos negosyanteng ginang nang maudlot ang planong outing makaraang mag-away sila ng kanyang mister sa Cainta, Rizal, kamakalawa ng hapon.

Kinilala ni PO3 Andrew Focasan ang biktimang si Rosemarie Indino-Cabatuan, nakatira sa Kayumanggi St., Karangalan Village ng nabanggit na bayan.

Sa imbestigasyon ng mga awtoridad, dakong 3 p.m. nang matagpuan nina Rowena Cabatuan, 23, at Jane Cabatuan, 27, kapwa beautician, ang biktimang nakabigti sa loob ng kanyang parlor sa 26 CRV Bldg., Felix Avenue, Karangalan Gate-2.

Nauna rito, plano ng biktima at ng kanyang mister na si Bernard Junio Santomin na mag-outing sa Daranak Falls sa Tanay, Rizal. Ngunit sa hindi malamang dahilan ay nag-away ang mag-asawa dakong gabi.

Sinasabing bunsod nang matinding depresyon dahil hindi matutuloy ang kanilang outing ay nagpasyang magbigti ang biktima.