P.1-M pabuya ikinasa vs pumatay sa traffic enforcer

NAGLAAN si Antipolo City Mayor Jun Ynares ng P100,000 pabuya sa sino mang makapagtuturo sa pumatay sa kababayang MMDA traffic enforcer.

Si Sydney Role, residente ng Brgy. Dela Paz ng lungsod, ay pinagbabaril ng dalawang lalaking sakay ng motorsiklo na kanyang sinita na nag-counterflow dakong 3:20 a.m. sa kanto ng Commonwealth Avenue, Tandang Sora, Quezon City, kamakalawa.

Ayon sa ulat, bumaba ang isa sa dalawang suspek at dalawang beses na binaril sa ulo ang biktima.

Isinugod ang biktima sa East Avenue Medical Center ngunit idineklarang dead on arrival.

Kaugnay nito, inatasan ni Mayor Ynares ang Antipolo PNP na makipag-ugnayan sa QCPD Police para sa agarang pagdakip sa suspek at sinabing nakahanda na ang P100,000 reward money.

Nakaburol na ang bangkay ng biktima sa Our Lady of Peace Chapel sa lungsod.

Habang sinabi ni MMDA Chairman Emerson Carlos, hindi titigil ang ahensiya sa pagtugis sa mga kriminal na pumatay sa kanilang kawani.