Tanggal-lisensiya sa abusadong taxi driver

IPINAKAKANSELA na ng Land Transportation Franchising and Regulatory Board (LTFRB) sa Land Transportation Office (LTO) ang lisensya ni Roger Catipay, ang taxi driver na nag-viral sa social media dahil sa paninigaw at pananakit sa kanyang pasaherong si Joanna Garcia.

Ayon sa LTFRB, personal na humarap si Catipay sa kanilang opisina para ipaliwanag ang kanyang panig.

Napag-alaman, nagpahatid ang biktima sa POEA, ngunit imbes maningil base sa metro, mas malaking halaga ang hinihingi ni Catipay at ayaw suklian ang kanyang sakay.

Bagama’t hindi nakuhaan ng buong video ang pangyayari, sinasabing sapat na ang 45 segundong footage bilang ebidensiya sa reklamo ng pasahero.

Si Catipay ay isinuko ng operator ng taxi makaraang mabalitaan ang eskandalong kinasangkutan ng driver.