HATAW! D'yaryo ng Bayan hatawtabloid.com
MAGBUBUKAS na sa Enero 21, Huwebes, ang unang torneo ng 2016 season ng PBA D League sa Filoil Flying V Center sa San Juan City.
Ang Aspirants Cup ay magiging unang torneo ng D League kung saan siyam na koponan ang kasali.
Unang maglalaban sa alas-dos ng hapon ang Caida Tile Masters kontra Tanduay Rhum Masters pagkatapos ng opening ceremonies sa ala-una.
Susunod na makakalaban sa alas-4 ng hapon ang UP-Jam Liner at ang Banco de Oro-National University.
Sa Enero 25, Lunes, gagawin ang mga laro sa Ynares Sports Arena sa Pasig kung saan maghaharap ang Café France at Mindanao Aguilas, kasunod naman ang bakbakang Phoenix Petroleum-FEU at Wangs Basketball.
Ang AMA Online Education ay ika-siyam na koponang kasali sa D League ngayong taong ito.
Ilan sa mga manlalaro mula sa UAAP at NCAA na magpapakitang-gilas sa D League ay sina Von Pessumal ng Tanduay, Mike Tolomia at Mac Belo ng Phoenix at Jason Perkins ng Caida Tiles.
Gagawin ang mga laro tuwing Lunes, Martes at Huwebes at mapapanood ang liga sa ATC-IBC Channel 13 simula alas-siyete ng gabi. ( James Ty III )
