Nene patay sa gumuhong riprap sa Antipolo

 PATAY ang 9-anyos batang babae nang matabunan ang kanilang bahay nang gumuhong ginagawang riprap sa

Road widening project ng Department of Public Works and Highways (DPWH) sa Antipolo City kamakalawa ng hapon.

Sa ulat na tinanggap ni Senior Supt. Bernabe Balba, Rizal PNP Provincial director, kinilala ang biktima na si Erika “Kim” Paclibar, 9, nakatira sa Sitio Kasapi, Brgy. Bagong Nayon sa lungsod.

Sa imbestigasyon ng mga awtoridad, dakong 5:35 p.m. nang gumuho ang riprap na ginagawa ng DPWH sa pagitan ng RCBC at isang mall at natabunan ang ilang kabahayan sa lugar.

Ilan din sa mga residente ang nasugatan sa insidente dahil sa debris na tumama sa kanila.

Agad nagsagawa ng rescue operations ang lokal na pamahalaan at pulisya kabilang ang ilang lokal opisyal.

Dakong 11:35 p.m. nang mahukay ang biktima at mabilis na isinugod sa Antipolo City Hospital ngunit idineklarang dead on arrival ng doktor.

Ilan sa kaanak at mga kaibigan ng pamilya Paclibar sa lugar ang humihingi ng hustisya at sinisi ang ilang opisyal ng DPWH at contractor dahil sa kapabayaan at kawalan nang seguridad sa nasabing proyekto.

Inaalam pa ng mga awtoridad kung ang DPWH o ang contractor ang may responsabilidad sa gumuhong riprap.

Dagdag ng mga residente, posibleng tinipid ng contractor at DWPH ang nasabing proyekto.