Sanggol dedbol sa bumagsak na aparador

NAGA CITY – Binawian ng buhay ang isang buwan gulang na sanggol makaraang mabagsakan ng natumbang aparador kamakalawa sa kanilang bahay sa Brgy. IV, Daet, Camarines Norte.

Napag-alaman, iniwan ni Marilyn Caliso, ina ng biktima, sa kanilang inuupahang bahay ang sanggol kasama ang dalawa pang mga anak na may gulang na 2-anyos at 4-anyos, upang maglaba.

Ngunit sa hindi inaasahang pangyayari, habang naglalaro ang dalawang bata ay aksidenteng naitulak ang aparador at nabagsakan ang sanggol.

Agad itinakbo sa ospital ng kanyang ina ang biktima ngunit sa kasamaang palad ay hindi na naisalba ng mga doktor.

Nabatid na nagtatrabaho sa ibang bayan ang ama ng biktima nang mangyari ang insidente.