Herbert, kamukha ni Sen. Ninoy (Kaya siguro gustong-gusto ni Kris…)

MATINDI pala ang pagkakahawig ni Quezon City Mayor Herbert Bautista kay Sen. Ninoy Aquino ‘pag nakasalamin ang actor-politician.

Napuna namin ‘yon noong nagpa-lunch siya sa showbiz reporters na nag-birthday ng July, August, at September. Sa Annabelle’s restaurant sa Morato Avenue ‘yon ginanap.

Walang-takot na binanggit namin ‘yon kay Mayor—at parang alam na n’ya ‘yon, parang hindi naman kami ang kauna-unahang nilalang na nagsabi sa kanya niyon.

“Kaya siguro gustong-gusto ka ni Kris Aquino—dahil kamukha mo ang tatay n’ya!” walang-takot naming biro sa kanya.

Matamis at may pagkamisteryosong ngiti lang ang tugon n’ya.

Bistek na Bistek pa rin ang hitsura ng Bagets actor. Walang pileges sa mukha. Walang tiyan. Pero alam n’yo bang 47 years old na siya?

Nagulat nga kaming mga apat o limang reporters na kaharap n’ya noong sabihin n’ya ‘yon. At kahit nga noong panahon pa ng pelikulang Bagets namin siya nakakaharap, hindi namin naisip lagpas na siya ng 30.

Kalahating tasa lang daw ng kanin ang kinakain n’ya every meal. ‘Di siya nagso-softdrinks at manufactured fruit juice. Panay tubig lang daw ang iniinom n’ya.

Wala siyang diabetes o ano mang karamdaman. Palangiti pa rin siya, at halos tunog Bagets pa rin ang boses at pananalita n’ya.

KITANG-KITA KO – Danny Vibas