10 katao nalason sa paksiw

NAGA CITY- Iniimbestigahan ng mga awtoridad at ilang eksperto ang dahilan ng  pagkalason ng ilang residente sa Brgy. Banga, Tinambac, Camarines Sur kamakalawa.

Ito’y makaraan isugod sa ospital ang 10 katao na nakaramdam nang pananakit sa tiyan, nakaranas ng pagsusuka at pagtatae makaraan kumain ng nilutong paksiw.

Ayon kay Chief Insp. Paul Cabug ng PNP-Tinambac, nagsimula ang insidente makaraan makakain ang naturang mga residente ng inihandang paksiw sa isang aktibidad ng lokal na pamahalaan sa lugar.

Ayon kay Cabug, makaraan dalhin sa ospital ang mga pasyente, agad nagsagawa ng pag-aaral ang ospital hinggil sa insidente at hinihintay na lamang ng mga awtoridad ang magiging resulta para sa pagpapatuloy ng imbestigasyon.

Nagbabala rin ang opisyal sa ilan pang mga residente na nakakain kung may nararamdaman nang kakaiba, agad humingi ng tulong sa mga awtoridad para sa agarang aksyon.