Sanggol ‘nalunod’ sa dedeng tubig (Ina naghanap ng pambili ng gatas)

BINAWIAN ng buhay ang isang-buwan gulang na sanggol na hinihinalang ‘nalunod’ sa ipinadedeng tubig habang mahimbing na natutulog ang ama sa Tondo, Maynila kahapon.

Hindi na umabot nang buhay sa Tondo General Hospital ang biktimang si Regine Ramirez ng 2701 Lico St., Tondo, habang isinasailalim sa interogasyon ng Manila Police District-Crimes Against Persons Investigation Section ang ama ng sanggol na si Rogin Ramirez, 36-anyos.

Sa imbestigasyon ni SPO2 Donald Panaligan, dakong 11:15 p.m. nang makita ng ama ang kanyang anak na wala nang malay sa loob ng kanilang bahay. 

Isinugod niya ang biktima sa pagamutan ngunit hindi na umabot nang buhay.

Napag-alaman na wala sa bahay ang ina ng sanggol, na si Janet dahil naghahanap ng mahihiram na perang pambili ng gatas ng biktima.

Ayon kay Rogin, dahil walang gatas, ipinasiya niyang padedehin muna ng tubig ang sanggol hanggang makatulugan niya.

Mahigit isang oras bago nagising at naalimpungatan si Rogin pero nakitang hindi na gumagalaw ang kanyang anak.

Gayonman, isinailalim sa awtopsiya ang bangkay  ng  sanggol  upang malaman ang tunay na sanhi ng kanyang kamatayan.