Bongbong hindi iboboto ng Marcos loyalist

WALANG suportang makukuha si Sen. Bongbong Marcos sa mga Marcos loyalist kung tuluyan siyang tatakbo bilang running mate ni Vice President Jojo Binay. 

Lalabas na walang utang na loob at hindi maituturing na tunay na dugong Marcos si Bongbong kung ang plano niyang maging bise presidente ni Binay ay matutuloy.

Taksil na matatawag si Bongbong dahil mismong si Binay ang isa sa mga nagpatalsik sa kanyang amang si dating Pangulong Ferdinand Marcos noong kasagsagan ng EDSA People Power I.

Tinaguring Rambotito, si Binay ay isang sagad-sagaring sipsip kay dating  Pagulong Cory Aquino na lumaban sa mga sunod-sunod na kudetang inilunsad ng Reform the Armed Forces of the Philippines o RAM.

Ang bilis makalimot nitong si Bongbong. 

Hindi ba kaya natalo siya noong 1995 senatorial elections ay dahil kinalimutan nila ang mga Marcos loyalist? 

Hindi niya dapat maliitin at hamakin ang tunay ng mga tagasuporta ni Apo Macos dahil tiyak na walang boboto sa kanyang Marcos loyalist sa darating na halalan.

Makabubuting tumakbo na lang muli sa Senado si Bongbong at huwag nang maniwala sa kanyang malalapit na adviser  na tumakbo siya bilang bise presidente sa darating na eleksyon.