Bebot tumirik sa pakikipagtalik

BACOLOD CITY – Nakatakdang isailalim sa autopsy examination ang bangkay ng isang 45-anyos babae na namatay makaraan makipagtalik sa 59-anyos lalaki sa loob ng isang lodging house sa Bacolod City kamakalawa ng gabi.

Kinila ang biktima sa pamamagitan ng kanyang voter’s ID na si Marian Baltazar, 45, residente ng Legazpi City, Albay ngunit nagtratrabaho sa isang videoke bar sa Silay City, Negros Occidental.

Habang kinilala ang kasamang lalaki na si Bill Mejica, 59, may asawa at residente ng Brgy. 1, Silay City, nakakulong na sa Bacolod Police Station 3, habang iniimbestigahan ang insidente.

Batay sa imbestigasyon, pumasok ang dalawa sa Rm. 37 ng Adam’s lodge sa Brgy. Bata, Bacolod City dakong 7 p.m. ngunit dakong 9 p.m. ay humingi ng tulong ang lalaki sa cashier nang himatayin ang kasamang babae.

Batay sa salaysay ng lalaki, inatake nang matinding ubo ang babae ilang minuto makaraan silang magtalik.

Sumuka rin aniya ang babae dahil sa matinding pag-ubo at parang hinika hanggang sa mawalan ng malay.

Tinangka ng cashier at roomboy na i-revive ang biktima sa pamamagitan ng pagmasahe ngunit hindi na nagkamalay si Baltazar at bumula ang bibig.

Agad isinugod ang biktima sa Corazon Locsin Montelibano Memorial Regional Hospital sa Bacolod City ngunit hindi na umabot nang buhay.