HATAW! D'yaryo ng Bayan hatawtabloid.com
IPINADIDISIPLINA ni Justice Secretary Leila de Lima ang opisyal ng National Bureau of Investigation (NBI) na nagsabing case closed ang kinasasangkutang krisis ng Iglesia ni Cristo (INC).
Tahasang sinabi ni De Lima, mali ang nasabing impormasyon dahil nagpapatuloy pa ang pagsisiyasat ng NBI.
Si Atty. Manuel Antonio Eduarte, hepe ng Anti Organized and Transnational Crime Division, ay hindi bahagi ng imbestigasyon sa INC kaya nagulat ang kalihim nang ianunsiyo niyang “case closed” na ang kaso.
Samantala, tumanggi si De Lima na isiwalat ang impormasyong ibinahagi ni Anthony Menorca, kapatid ng sinasabing dinukot na INC Minister na si Lowell Menorca.
Nauna nang nagpasailalim sa Witness Protection Program si Anthony na naniniwalang ang pagtanggi ng kanyang kapatid na siya ay dinukot ay dahil lamang sa utos ng Sanggunian ng INC.
Sapilitan lamang aniya ang ginawang pagtanggi ng kanyang kapatid dahil hawak ng Sanggunian ang asawa at anak ni Lowell Menorca.
