4 kelot sugatan sa kuyog ng 20 gangsters

APAT katao ang sugatan makaraan kuyugin ng 20 gangsters sa Tondo, Maynila kamakalawa ng gabi.

Ginagamot sa Gat. Andres Bonifacio Hospital ang mga biktimang sina Reyna Ramirez, 22; Charlie Brinolo, 23; Jorlyn Orongon, 22; at Arnel Gadia, 45-anyos. Ang apat ay pawang construction worker sa itinatayong gusali sa Masangkay St., sa Tondo.

Sa ulat ni Supt. Jackson Tuliao, station commander ng Manila Police District Station 2, naglalakad ang mga biktima pabalik sa construction site nang makasalubong nila ang tinatayang 20 kalalakihan.

Sa hindi malamang dahilan, kinuyog sila ng mga suspek na armado ng kahoy at patalim. Pagkaraan ay nagtatawanan pa ang mga suspek nang sila ay iwanan.

Pinag-aaralan na ng mga awtoridad ang nakuhang footage sa nakakabit na CCTV sa lugar upang matukoy ang pagkakakilanlan ng mga suspek.

Samantala, nananawagan ang mga magulang at mga biktima na higpitan ng pamahalaang lungsod ang pagpapatupad ng curfew sa upang masawata ang gang crimes na kadalasang nagaganap dakong gabi.