Davao del Norte niyanig ng magkakasunod na lindol

NIYANIG nang magkakasunod na lindol ang bayan ng Santo Tomas, Davao del Norte simula nitong Sabado hanggang Linggo.

Sa tala ng Philippine Institute of Volcanology and Seismology (Phivolcs), unang niyanig ng magnitude 4.6 na lindol ang bayan ng Santo Tomas, dakong 11:17 Sabado ng gabi.

Tumama ito sa lalim na walong kilometro at nadama ang intensity 4 na pagyanig sa Sto. Tomas habang intensity 3 sa Davao City.

Nasundan pa ito ng magnitude 3.5 na lindol sa kaparehong bayan, dakong 11:37 p.m.

Mula 1 a.m. hanggang 8:52 a.m. nitong Linggo, nakapagtala pa ng magnitude 3.2, 3.4 at 3.7 na pagyanig sa Sto. Tomas.

Walang inaasahang pinsala ang Phivolcs sa kasunod ng mga nabanggit na paglindol.