Ang pagbabalik ni Sangalang

KINASASABIKAN na ang pagbabalik sa active duty ni Ian Sangalang para sa Star Hotshots sa 41st season ng Philippine Basketball Association.

Kasi nga naman ay isang game lang ang nalaro ni Sangalang noong nakaraang season at paglatapos ay na-sidelined na siya buong conference nang napunit ang anterior cruciate ligament. Kinailangang operahan ito at hindi bumaba sa anim na buwan ang recuperation. Bagama’t puwede na sana siyang maglaro ay hindi na siya isinugal ng Star sa dulo ng season.

Sa pagkawala ni Sangalang, marami tuloy ang nagsabi na siya ang isa sa malaking dahilan kung bakit nabigo ang Star na maipagtanggol ang isa sa tatlong kampeonatong napanalunan nito noong 39th season. Naubos ang titulo ng Star at hindi man ito nakarating sa Finals ng kahit alin sa tatlong conferences.

Ang pagkawala nga ba ni Sangalang ang dahilan?

Puwedeng oo. Puwedeng hindi.

Kasi ay napalitan naman ang puwesto ni Sangalang nang makuha si Mick Pennisi.

Pwero siyempre, matanda na si Pennisi at bata si Sangalang. Malaki ang agwat sa kanilang edad.

Pero hindi naman si Sangalang lang ang naging dahilan kung bakit naka-Grand Slam ang Star, e. Buong koponan iyon, e.

So, puwede rin namang pinunan ng kanyang mga kakampi ang pagawala ni Sangalang.

Kaya lang ay hindi nangyari iyon.

Kasi’y tila nabusog na ang Hotshots. Tila nawala ang kanilang gutom at uhaw dahil sa nakumpleto na nga nila ang Grand Slam.

Ewan natin kung guton ulit sila sa pagpasok ng 41st season.

At hindi rin natin alam kung paano gagalaw ang Hotshots sa ilalim ng kanilang bagong coach na si Jason Webb.

Malaking hamon ito para kay Webb!

SPORTS SHOCKED – Sabrina Pascua