Immigration ‘natakasan’ ng illegal foreign workers

PALAISIPAN ngayon sa Bureau of Immigration kung saan na napunta ang 22 foreign nationals na kasama sa mga nahuli sa isang raid sa Pasay City nitong nakaraang linggo.

Nitong Hulyo 21, sinalakay ng BI ang isang tanggapan sa Pasay City at naaresto ang 169 foreign nationals, karamihan ay Chinese, na pinaniniwalaang ilegal na nagtatrabaho bilang call center agents at online gambling operator.

Labing apat ang nakapagpakita ng tamang visa at working permit kaya daw pinakawalan.

Pero may isang unaccounted o naglahong parang bula, habang 21 ang sinadyang palayain makaraang magpakita umano ng CEZA o Cagayan Economic Zone Authority special visa. 

Ayon kay Atty. Elaine Tan, tagapagsalita ng BI, ‘di sila dapat pinawalan dahil ang CEZA ay hindi awtomatikong patunay na walang paglabag sa immigration laws ang mga banyaga.

Dapat aniya ay bineripika muna ng raiding team na pinamunuan umano ng isang contractual agent na retiradong Kernel ang kanilang dokumento.

Sa huli , 155 lang ang tuluyang naaresto at nahainan ng reklamo para maipa-deport.

Dahil dito, seryosong pinaiimbestigahan ni BI Commissioner Siegfred Mison ang kanilang hanay upang malaman kung may money involved sa nawawalang Chinese workers nang sa gayon ay hindi mabahiran ng kontrobersiya ang kanilang ginawang operasyon.

Pinagsusumite rin niya ng written explanation ang mga opisyal na nanguna at kasama sa raid.

Leonard Basilio