Endorsement ni PNoy kay Mar kasado na

KASADO na ang pag-eendorso ni Pangulong Noynoy Aquino para sa mamanukin niya para sa eleksyon sa 2016. 

Tulad ng sinabi ng Pangulo, sa katapusan ng Hulyo niya ibubunyag ang napipisil niyang kasunod sa pampanguluhan.

Kinompirma naman ni Kalookan Representative Egay Erice na sa kanyang palagay ay ieendorso na ni PNoy si DILG Secretary Mar Roxas bago matapos ang linggong ito. 

“Wala namang duda na iisa ang puso’t diwa at direksyon ng pangulo at ng partido kaya wala nang ibang kuwalipikado para ituloy ang mga nagawa ng administrasyong ito kundi ang kanyang co-pilot na si Secretary Mar Roxas,”  pahayag ni Erice.

Ayon kay Erice, naniniwala ang administrasyon na taglay ni Roxas ang kakayahan, puso at integridad upang ituloy ang magandang sinimulan ng “Daang Matuwid.”

Lalong umugong ang pangalan ni Roxas pagkatapos ng papuring ibinigay ni PNoy ng nakaraang State of the Nation Address (SONA).

Iginiit ni PNoy na ni minsan ay ‘di tinigilan ang banat kay Roxas dahil alam ng mga kalaban na siya ay may ibubuga.

Hinimok rin ni PNoy si Roxas na huwag panghinaan ng loob dahil napatunayan na “you can’t put a good man down” aniya.

Usap-usapan, sa Club Filipino muli gagawin ang endorsement, isang makasasaysayang lugar para kina Aquino at Roxas. Matatandaang noong 2009 ay dito rin inianunsyo ni Roxas na siya ay magbibigay-daan sa kandidatura ni Aquino.

Noong 1987, dito rin nanumpa bilang pangulo ang ina ni PNoy na si Cory Aquino pagkatapos ang snap elections.