SONA kapos sa totoo — Bayan Muna

HINDI makatotohanan ang mga mga inilahad ni Pangulong Benigno “Noynoy” Aquino III sa kanyang ikaanim at huling State of the Nation Address (SONA) nitong Lunes.

Iginiit ni Bayan Muna Rep. Neri Colmenares, hindi pwedeng mga nagawa lamang ng administrasyon ang ibida sa SONA bagkus, ay dapat din banggitin ang realidad.

“Ang tunay na state kasi, hindi ‘yung iiwasan mo ‘yong masamang balita. Kasi ang state of the nation, hindi accomplishment report… kung may accomplishment ka e ‘di sabihin mo, pero kung may kapalpakan ka, sabihin mo rin kasi ‘yan ang tunay na kalagayan, otherwise, niloloko mo ang taumbayan,” pagdiiin ni Colmenares.

Aniya, pawang walang katotohanan ang mga ibinida ng Pangulo tulad na lamang sa usapin ng edukasyon, peace and order at maging ang pag-angat ng buhay ng mga ordinaryong mamamayan.

Giit niya, hindi nabanggit ang ilang mahahalagang panukalang batas tulad ng Freedom of Information Bill habang iniwasan ang usapin sa Mamasapano incident.

“Hindi niya binanggit ‘yung SAF 44. Ano na’ng gagawin mo ro’n? Hindi mo ba papanagutin ‘yung mga nagbala sa kanyon sa SAF 44? Wala e. Kasi alam naman natin, sa tingin namin bilang oposisyon, siya ang isa sa dapat managot kasi roon kaya ang hirap niya banggitin.”

Kombinsido ang mambabatas na maraming pagkakamali si Aquino sa limang taon panunungkulan sa bansa at pinakamalaki sa mga ito ang isyu ng agrikultura at industriyalisasyon.