Pagpapalaya sa 22 illegal workers ipinabubusisi

PALAISIPAN sa Bureau of Immigration (BI) kung saan napunta ang 22 foreign nationals na kasama sa nahuli sa raid sa Pasay City noong nakaraang linggo.

Hulyo 21, sinalakay ng BI ang isang tanggapan at naaresto ang 169 banyaga, karamiha’y Chinese nationals, nagtatrabaho bilang call center agents at online gambling operators.

Labing-apat ang nakapagpakita ng tamang visa at working permit kaya pinakawalan.

Ngunit may isang biglang nawala habang 21 ang sinadyang palayain makaraan magpakita ng Cagayan Economic Zone Authority (CEZA) special visas.

Ayon kay Atty. Elaine Tan, tagapagsalita ng BI, hindi dapat pinawalan ang mga dayuhan dahil ang CEZA ay hindi awtomatikong patunay na walang paglabag sa immigration laws ang mga banyaga.

Dapat aniya ay bineripika muna ng raiding team ang kanilang dokumento.

Sa huli, 155 lang ang tuluyang naaresto at nasampahan ng reklamo para i-deport.