Bianca, last season ng PBB na single siya

ni  Rommel Placente

SA pinakabagong edisyon ng PBB All In itinampok ang bagong susubaybayang housemates na may edad na 15 hanggang 30 taong gulang na haharap sa iba’t ibang challenges at susubukin ang pagpapakatotoo sa loob ng 100 days.

Pinangunahan ang PBB All In ng hosts na sina Toni Gonzaga, Bianca Gonzalez, John Prats, Robi Domingo at ang bagong ka-hang out ni Kuya na si Alex Gonzaga.

Ngunit bago ang grand kick-off kahapon, may ilang housemates nang unang ipinakilala sa ASAP 19at Buzz ng Bayan.

“Hindi ko alam kung anong pwedeng i-expect ng viewers sa ‘PBB’ kasi ang lahat na nangyayari sa loob ng bahay, unexpected. Pati kami, inaabangan namin kung ano ang mangyayari, ang bagong tasks, ‘yung clash ng iba-ibang personalities,” ani Toni.

Nagsimula si Toni bilang host noong unang regular season pa lang ng  PBB, ngunit hanggang ngayon ay excited pa rin daw siya kung ano ang mapapanood nilang bago sa show.

“I was only 21 when I joined ‘PBB.’ Hindi na siya trabaho para sa akin, kumbaga pangalawang pamilya ko na. Nag-mature at nag-grow ako rito hindi lang bilang host pero bilang tao na rin,” dagdag niya.

Ano ang naging reaksiyon niya nang malamang muling magbabalik sa ere ang PBB?

“In-expect na namin. Nag-expect agad kami,” natatawang sabi ni Toni.

“Kasi ang tagal-tagal nagpahinga sa ere ang ‘PBB’. Almost a year and a half.

“So in-expect namin na talagang magbabalik siya sa ere.

“Noong nawala ‘yung ‘PBB’ naging busy kami sa kanya-kanyang buhay namin.

“Na-engage na si Bianca. Tapos sabi namin bago sana ikasal si Bianca magbukas ulit ‘yung Bahay Ni Kuya.

“Ito ang last season ni Bianca na single siya.”

Siya rin ba last season na single siya?

“Hindi natin masasabi,” natatawang sagot ni Toni.

“Sa takdang panahon siguro malalaman natin.”