Ogie Alcasid, inamin ang pagiging torpe sa babae

ni Nonie V. Nicasio

MAY bagong katatawanang handog ang Kapatid Network sa pamamagitan ngConfessions of a Torpe.  Simula sa Lunes, March 3, mapapanood na sa TV5 ang bagong misadventures ng isang torpe sa katauhan ni Tupe na gagampa-nan ni Ogie Alcasid.

Ang tawa-seryeng ito bale ang papalit sa mababakanteng timeslot ng Madam Chairman ni Sharon Cuneta na magtatapos ngayong Biyernes, February 28.

Bukod kay Ogie, bida rin dito si Alice Dixson. Gagampanan ni Ogie ang karakter ni Christopher “Tupe” Catacutan na umibig noon kay Monique Salcedo, ang karakter naman ni Alice.

Paano nga ba babaguhin ng kasalukuyang panahon at sa mga nakapalibot na personalidad ang pagiging torpe ng isang 40-year-old single and available na si Tupe? Iyan ang matutunghayan sa bagong seryeng ito ng Singko.

“I played Tupe, Christopher, nanay ko si Bibeth Orteza, mama’s boy ako… Masyado akong sheltered dito e, kaya ang approach ko sa crush na si Alice, laging palpak.

“Mula noong bata hanggang sa pagtanda ko, takot akong manligaw, takot ako sa babae,” esplika ng singer/comedian.

Sinabi pa ni Ogie na sa totoong buhay ay torpe talaga siya sa babae. “I’m always torpe, I’m horribly shy,” nakatawang saad niya.

Optimistic si Ogie sa bagong show nilang ito. “Matatawa kayo, maiiyak kayo, kikiligin kayo at siguradong magugustuhan ninyo ito. It’s funny, it’s cute, I love the casts.”

Nakatakdang ipalabas ang Confessions of a Torpe  nga-yong Lunes, 7:30 p.m. Kasama rin sa cast ng sina Gelli de Belen, Wendell Ramos, Albie Casiño,Shaira Mae, Mark Neumann, Bayani Agbayani, Jojo Alejar, at iba pa.

Jun Lana’s  Mga Kuwentong Barbero, nominado  sa 3rd Madrid  International  Film Festival

NAKATANGGAP ng apat na nominasyon ang pelikulang Barber’s Tales (Mga Kuwentong Barbero) sa 3rd Madrid International Film Festival sa Spain na gaganapin sa Hulyo ng taong ito.

Nominado ang pelikula para sa kategoryang Best Foreign Language Film, samantalang ang writer-director nitong si Jun Lana ay nominado naman bilang Best Director in a Foreign Language Feature Film.

Ang bida ritong si Eugene Domingo ay pasok din sa kategoryang Best Lead Actress in a Foreign Film. Samantalanmg ang indie-producer namang siFerdinand Lapuz ay nominado para sa Best Feature Film producer.

Ang pelikulang ito ay nanalo ng apat na award sa Hong Kong Asia Film Financing Forum noong isang taon. Ito ay pinrodyus nina Tony Tuviera ng APT Entertainment at ng Octobertrain Films nina Direk Perci Intalan at Direk Jun.

Kabilang din sa cast ng pelikulang ito sina Eddie Garcia, Iza Calzado, Gladys Reyes, Shamaine Buencamino, Nonie Buencamino, Sue Prado, Daniel Fernando, Nicco Manalo, Jess Mendoza, and with the special participation of Ms. Nora Aunor.

Ginagampanan dito ni Eugene ang papel na isang biyuda ng barbero na tumutulong sa mga rebelde.

Sa panayam kay Direk Perci, pahapyaw niyang inilarawan ang pelikulang ito ni Uge. “It’s set in 1975, during Martial Law era. It’s about a woman’s awakening and empowerment niya.”