PNoy, tutulong daw kay Michael sa 2018

Ed de Leon

NATAWA kami roon sa sinabi ni Secretary Sonny Coloma, na hinanap daw nila ang e-mail ng nanay ni Michael Christian Martinez, pero hindi raw talaga nakita iyon sa Malacañang. Baka raw nakasama sa spam. Pero sinabi niyang sumusuporta pa rin sila kay Michael, at tutulong sila sa pagsali niyon sa susunod na Winter Olympics sa 2018.

Pero hindi ba nakatatawa iyon dahil sa 2018 ay hindi na presidente si PNoy at tiyak wala na rin naman sa Malacañang si Coloma. Paano pa nila nagawa ang pangakong iyon?

Bilang suporta, binigyan naman agad ng negosyanteng si Manny Pangilinan ng $10,000 si Michael bilang incentive sa magandang ipinakita niya sa Sochi, Russia. Nabawasan tuloy ang pagkainis namin sa bulok na internet service ng PLDT at sa nalalapit na strike ng mga manggagawa sa TV5, na nagrereklamong ang laki ng gastos sa building, sa talent fee ng mga artista, pero hindi madagdagan ang kanilang sahod.

Sana nga may mga tumulong pa kay Michael para sa susunod niyang bid. Iyong mga wala na sa puwesto by that time, huwag nang mangangako.