Daniel at Jasmine, kuwelang loveteam sa The Replacement Bride

ni   Reggee Bonoan

Cute at nakatutuwa naman ang kuwento ng The Replacement Bride nina Jasmine Curtis-Smith at Daniel Matsunaga dahil halos fresh pa sa amin ang pelikulang Bride For Rent ninaKim Chiu at Xian Lim, heto at may romantic comedy serye rin ang TV5.

Kuwelang loveteam sina Daniel at Jasmine na base sa kuwento ay in-love si girl sa kanyang bestfriend na si Edgar Allan Guzman (bakit parang nag-iba na ang hitsura) na magpapakasal sa ibang babae at dahil hindi matanggap ay pumunta ng simbahan ang una at sumigaw ng, ”Itigil ang kasal!” na nagkataong sina Daniel at Arci Munoz pala ang ikinakasal.

Siyempre, naloka si Arci at iniwan si Daniel na takang-taka kasi hindi naman niya kilala si Jasmine na panay ang hingi ng dispensa sa kagagahang ginawa.

At dahil galit na galit na si Daniel kay Jasmine ay hiningi nitong ayusin silang dalawa ni Arci sa anumang paraan.

Since parating magkasama sina Daniel at Jasmine kaya nagka-developan na hindi na itinuloy ang mga susunod na eksena.  Sa madaling salita, nambitin na naman ang Replacement Bride kaya aabangan na lang namin sa Pebrero 18, Martes sa Studio 5 Original Movies.