The Fort, ‘malas’ sa mga Showtime host (Vhong, lalong namaga ang mukha)

ni Reggee Bonoan

NAGING running joke na sa social media na dapat iwasan ng Showtime hosts ang The Fort dahil tila hindi suwerte sa kanila ang nasabing lugar.

Matatandaang sa The Fort (Prive Luxury Club) naganap noong nakaraang taon ang pananampal ni Anne Curtissa kapwa niya ABS-CBN talent na si John Lloyd Cruz at nakapagsalita ng hindi maganda kay PhoemelaBarranda at ilang kaibigan nito.

At nitong huli ay si Vhong Navarro naman ang na-involve sa isang condo unit sa The Fort na binugbog siya ng anim katao.

Sabi nga sa jokes ng netizens, “sa The Fort nanampal si Anne, sa The Fort binugbog si Vhong, sino at ano kaya susunod na mangyayari? Dapat iwasan ng ‘Showtime’ hosts ang The Fort.”

Oo nga naman.

Speaking of Vhong, nakatsikahan namin si Jugs Jugueta, ang bokalista ng Itchyworms sa ginanap na Ginuman Festival sa Tutuban parking area para sa unang leg ng festival ng Ginebra San Miguel at nabanggit ng kasamahan ng TV host/actor sa Showtime.

Ayon kay Jugs ay dinalaw na raw niya si Vhong sa hospital at talagang magang-maga na raw ngayon ang mukha ng dancer/aktor.

“Mas maga ngayon parang umalsa ‘yung mukha niya, unlike ‘yung nakita ninyo sa news o facebook. Hindi sure kung ooperahan pa kasi parang okay naman yata.

“Nakakapagsalita at nakakakuwentuhan namin si Vhong at nakakatayo naman siya,” kuwento ng singer/TV host.

Sobrang nalungkot si Jugs sa nangyari kay Vhong kaya humihingi rin siya ng panalangin sa lahat ng nanonood ngShowtime.