HATAW! D'yaryo ng Bayan hatawtabloid.com
MAHIGIT sa isandaang pamilya ang nawalan ng tirahan makaraang lamunin ng apoy ang may 50 kabahayan kahapon ng umaga sa Tenajeros, Malabon City .
Sa ulat ng Bureau of Fire Protection (BFP) Malabon, dakong 9:21 ng umaga nang sumiklab ang apoy sa bahay ng isang Wilma sa Arasity Village, Brgy. Tenajeros ng nasabing lungsod.
Naiwan ng ginang ang kanilang kalan habang nagluluto ng almusal matapos maghatid sa kanilang mga anak sa kalapit na paaralan at pagbalik ng bahay ay nagliliyab na ang kanilang tirahan.
Nabatid na nahirapan ang mga bombero na madaliang patayin ang apoy dahil sa makitid na mga eskinita sa nasabing lugar.
Walang naiulat na namatay o nasaktan sa nasabing sunog na umabot ng ikalimang alarma at naapula dakong tanghali sa pagtutulungan ng mga bombero ng mga karatig na lungsod at mga fire volunteers.
(rommel sales)
