Buwenas si Sauler

PARANG itinadhana ngang talaga na makakakumpleto ng ‘Cinderella finish’ si Juno Sauler sa 76th season ng University Athletic Association of the Philippines (UAAP).

Noong Sabado ay naihatid ni Sauler sa kameonato ang dela Salle Green Archers sa pamamagitan ng 71-69 overtime na panalo kontra sa University of Santo Tomas Growling Tigers.

Actually, naunahan ng Growling  Tigers ang Green Archers nang mapanalunan nila ang Game One ng best-of-three championship series.

Pero hindi nawalan ng loob ang tropa ni Sauler. Kinuha nila ang Game Two upang mapuwersa ang winner-take-all Game Three.

Kung tutuusin, puwede sanang napanalunan ng UST ang Game Three dahil nasa Growling Tigers ang huling possession may anim na segundo pa ang nalalabi sa regularion play at tabla ang score, 63-all.

Tinanggap ni Aljon Mariano ang inbound pass buhat kay Jeric Teng subalit hindi nito ibinalik ang bola. Sa halip ay tumira ito ng  three-point shot at nagmintis

Napakamot ng ulo si UST coach Pido Jarencio dahil tila hindi iyon ang play na ikinrokis niya. Isa pa, sa kabuuan ng laro ay malas si Mariano at walang field goal na naipasok. So kung ikaw ang coach, natural na hindi mo ipagkakatiwala sa kanya ang game-winning play.

Sa overtime ay napabayaan ng Growling Tigers na bukas si Almond Vosotros para sa game winning shot buhat sa pasa ni Jeron Teng na siyang pinarangalan bilang Best Player ng Finals.

May pagkakataon pa sana ang UST na itabla ang score at mapuwersa ang ikalawang overtime pero hindi na ito nangyari dahil sumablay ang Growling Tigers.

Suwerte talaga si Sauler dahil sa hindi naman talaga siya ang hahawak sa La Salle, e. Itinalaga siya bilang kapalit ni Gelacio Abanilla III dalawang linggo bago nagsimula ang torneo.

Kaya nga sinasabi natin na itinadhana talaga na mapanalunan niya ang titulo.

Sino ba naman ang mag-aakalang magagawa niya ito sa maikling panahong ipinagkaloob sa kanya?

Sabrina Pascua