P.3-M natangay sa sikat na cager

Tinatayang aabot sa P.3 milyon halaga ng ka-gamitan ang tinangay ng Akyat-Bahay gang sa tahanan ng sikat na PBA  player kahapon ng hapon sa Pasig City.

Ayon kay Pasig City police chief Sr/Supt. Mario Rariza, pinagnakawan ang bahay ni PBA cager Jimmy Alapag nasa #35 San Manuel St., Brgy. Kapitolyo ng lungsod.

Ayon kay Lari Jeanne Alapag, 32-anyos, dakong 4:30 ng hapon nang madiskubre ang pagna-nakaw ng  nakababatang kapatid na si Alodia Deanne Ricafort, 15-anyos.

Galing umano sa eskwelahan si Ricafort kasama ang kanilang kasambahay  at driver nang madiskubre na bukas ang pinto sa likuran ng bahay.

Sa kanilang pagsisiyasat, nawawala ang mamahaling gamit gaya ng isang Mcbook Pro, nagkakahalaga ng P100,000,  iPhone 5S na nagkakahalaga ng P35,000, isang iPod 2, nagkakahalaga ng P20,000 at 5 assorted  wristwatches na nagkakahalaga ng P100,000.

Ayon sa kasambahay na si Irene Egay, 23, may asawa, tubong South Cotabato, ikinandado umano niya ang lahat ng pintuan bago sila umalis dakong 1:00 ng hapon para  samahan sa eskuwelahan si Ricafort sa Makati City.

Nagsasagawa na ng masusing imbestigasyon ang pulisya para matukoy ang mga salarin.

MIKKO BAYLON